एकता सरल उपाय हो

एकता सरल उपाय हो
तर हाम्रो स्वार्थले
हाम्रा आँखा
अन्धाएको छ
हाम्रा पुर्पुरो
बँधाएको छ
हाम्रा हात र पिठिऊँ
गधाएको छ

मेलमिलाप होइन
छलकपट थियो
हाम्रो इतिहास ।
शक्तीसघँर्षका दौरान
परायाआफन्त नभनी
रगतले फागु खेल्ने
क्रुर अधिनायक शाषकहरूका
दैनिकी हो
हाम्रो इतिहास ।

गलत कोणबाट मलाई
हेर्न लगाई
घमन्डी बनाइयो त के भो
बुझ्नेजान्ने भएपछि म आफैँले
सही कोण पहिल्याएँ
र भन्छु त्यसैले
घृणा लाग्छ मलाई
यो देशको इतिहास ।

तर
मरिसके ती दिनहरू
जलिसके सब खलपात्र
अनि बगिसके
हजारौँलाखौँ आखाँबाट
आशुँधारा
लज्जाग्नीको रापताप बुझाउन ।

त्यसैले
गौरव पनि नमानी
शरम पनि नठानी
गोल्चक्रीय समयको भूमरीले
सीमित गरिदिएको नयाँ भुगोल
र बद्लाउन नसक्ने पुरानै नाम
सहितको युगसुहाउँदो नयाँ वर्तमान
रच्न सक्ने सूत्र
एकता र मिलापको सूत्र
म सुन्न चहान्छु जपेको
जनजनले तीनका मनबाट ।