राष्ट्रियता

 मैँले सप्रेम स्वीकारेको छु 

मतलब नबिर्स मसँग विकल्प थिएन,

म भर्खर झरेको मात्र थिएँ आमाको कोखबाट,

र झर्दछन् सबै जगतमा एकैसरी आमाकै कोखबाट ।

मतलब, मेरा पुर्खाको आस्थालाई मैले 

पुष्पगुच्छा चढाउनु पर्छ, रक्तरञ्जित गर्नुपर्छ

परिआए, भन्ने कुरा मेरो पनि आस्था हो,

र आस्था चुडिएको धेरै पटक मैले भोगेको छु ।

मतलब, देवता त सहजै पुराना त्यागेर

युगानुसारको नयाँ झिल्के अपनाइन्छ यहाँ,

भजनको आत्मा जस्ताको त्यस्तै राखेर

भेटीको वजन उत्ती, प्रसादको स्वाद त्यही ।

मतलब, अर्धाङ्ग त टुक्राटुक्रा यहाँ पटकपटक 

सहज बिच्छेद-पुनर्छेद, मतियार अनि तिमी नै

मैले टेकेको माटोको नामप्रतिको मेरो प्रेम,

प्रेम मैले पटकपटक मरेको बाँचेको छु ।

मतलब, मतलबको मतलब बुझ आफैँ ।