उदघोष

उदघोष

हटोस् हरप्रकारको द्वन्द्व हिजोकोजस्तो
र निरपेक्ष शान्ति आओस् ।
चाहन्नौ तिमी यस्तो ?

चाहन्नौ म पनि आवाज नउठाऊँ
क्रान्ती शब्द भुलूँ
र अरूझैँ कमाउनका निमित्त बाचूँ
खर्चिन मात्रका लागि होडबाजी गरूँ ?

त्यसो हो भने न्याय गर ।
मेटिदेऊ असमानता र कोरिदेऊ समता
हुनेखाने र हुदाँखानेको वीच
गुमाइरहेका र ब्रह्म्लुट गरिरहेका वीच
परिश्रम किन्ने र परिश्रम बेच्नेको वीच

लाग्दैन तारा टिपी ल्याई बाँड भन्दै छु
मात्र भन्दै छु बराबरी गर
जति छ सबैलाई पुग्छ
भोकाएकालाई धेरै देऊ
थुपारी राख्नेको खोसिदेऊ ।

कानुन त कसैको स्वार्थ मात्र न हो
चेतनाद्वारा शासन गर
शासित होऊ ।

जब विश्वको कुनै एक कुनामा म भोको छु
बेरोजगारी, महँगीका कारण नाथे रोटी कमाउन सकिरहेको छैन
किन अर्को कुनामा चन्द्रमामा पुग्न हानाथाप खर्च भइरहेछ ?
हतियार र युद्धका निमित्त जति खर्च हुन्छ
किन त्यो कृषी र उद्योगमा लगानी हुदैँन ?
किन त्यो प्रकृती संरक्षण र मानवता प्रवद्र्घनमा लगानी हुदैँन ?

माटो मेरो पनि हो
जुन तिमी आफ्नो भन्छौ
त्यसैले मैले खसालेको मतको कदर होस्
नत्र कुनै प्रकारको शासन ममाथि नहोस्

त्यसपछि तिमी मेरो राष्ट्र
र म तिम्रो नागरिक होइन ।