ढोकाको तालाको उपहास

मातेको बोतल
हातमा मस्त नचाउँदै
मुखारविन्दुबाट
जमानाविरोधी गाना गाउँदै

लमकलमक
दायाँ खुट्टा बायाँ
बायाँ खुट्टा दायाँ

घरसम्म त आइपुग्छु
तर देख्छु
आज पनि
मूल ढोकामा ताल्चा
भोटेनीको नाकको बुलाकी जत्रो
यत्रो !


सुरक्षाको घोर भरोसाले
मारिएको हुन्थ्यो होला साँचो

तर के छेक्थ्यो मलाई
पर्खाल उक्लिदिन्छु म

ढोकाको तालाले रोकिनेछेकिने त
सज्जनहरू मात्र न हुन्