बेहिसाब मृत्युहरू

 यो गर्नु छ, त्यो गर्नु छ

त्यहाँ पुग्नु छ, फलाना भेट्नु छ

अहिल्यै हिँड्नु छ, भरे फर्कनु छ  

कमाउनु छ, किन्नु छ

दिएको  थिएँ, लिनु छ 

बोलेको छु, पुर्याउनु  छ 

उद्देश्य थियो, जित्नु छ

म छु, मेरो योजना छ

माथि दैव छन्, 

मन्द मुस्कान दिन्छन् छड्के शीर

आँखा झिमिक् झिमिक 

यहाँ आकाश मृत्युलाई बल्छी थापेर बसेको छ

यहाँ सडक मृत्युलाई बल्छी थापेर बसेको छ

यहाँका खोलानाला, तालहिमताल मृत्युकै भोका छन् 

यहाँका भीरपहाड, पाखापहारा मृत्युकै भोका छन्

हिजोको समाचारमा पनि मृत्यु, 

आजको समाचारमा पनि मृत्यु,

यस्तो लाग्दैन ती पर छेकडा ताक खोजी बसेको छ मृत्यु,

नरभक्षी चितवनको बाघ जस्तो ?

जिन्दगी सस्तो छ जहाँ, बेहिसाब मृत्युहरू कतिकति

महँगा योजनाहरू, अमूल्य सपनाहरू

नबोक्दा खेरी भारी, बोक्दा खेरी व्यर्थै ।